Gure helburua da dibulgazio zientifikoa ahalik eta modurik dibertigarrienean eta entretenigarrienean egitea. Eratutako taldea jakintza zientifikoaren adar desberdinetan aditua denez, “Miszelaneak” deitzea erabaki dugu, gure ekarpenaren izaera plurala eta heterogeneoa azpimarratu nahian.
Minbiziaren eta plastikoen, mikroplastikoen, horietatik eratorritako hondakinen eta abarren artean egon daitekeen harremana azalduko da. Gainera, plastikoek ingurumenean sortzen dituzten arazoak ere aipatuko dira, eta “one health” kontzeptuarekin lotuko da guztia.
Horrez gain, horien kudeaketari, birziklapenari eta plastiko “berrien” sorrerari buruzko gaiak landuko ditugu. Azkenik, substantzia horien degradazioari buruz ere hitz egingo dugu, genetikoki eraldatutako organismoek eragindako deskonposizio biologikoak garrantzia har baitezake. Azken horri loturik, esperimentuak egiteko gune txiki bat prestatuko dugu. Era berean, pantaila bat jarriko dugu, non iraupen laburreko bideoak ikusi ahal izango diren, eta egoerak hala eskatzen duenerako aurkezpen txiki bat ere jarriko den.
