| Hizkuntza: euskara, gaztelania |
Txoko honetan modu praktiko eta hurbilean, erizaintzako zainketen funtsezko bi arlo ikasiko dituzu: bihotz-biriketako bizkortzea (BBB) eta larruazalaren zainketak.
1. multzoa: Bihotz Biriketako Bizkortzea (BBB) helduetan eta haurretan
Bihotz-biriketako geldialdi baten aurrean biziraupen-kateari jarraituz jarduten ikasiko duzu, oinarrizko BBBko maniobrak eginez pertsona helduetan zein haurretan. Kanpoko desfibriladore automatikoa (KDA) ere ezagutu eta erabili ahal izango duzu, gaur egungo gomendioei jarraituz.
2. multzoa: Larruazalaren zainketak
Larruazala da gorputzaren lehen defentsa-hesia, eta hori zaintzea funtsezkoa da. Espazio honetan oinarrizko teknikak irakatsiko dizkizugu, hala nola eskuak garbitzea, eskularruak behar bezala jartzea eta larruazal osasuntsua zaintzea. Zaurien zainketei ere helduko diegu, baita zauri kirurgikoei, erredura arinei eta ohiko beste asaldura batzuei ere.
Publikoak material eta simulatzaileekin elkarreragin, ikasle eta irakasleekin zalantzak argitu eta eguneroko bizitzarako tresna erabilgarriak eraman ahal izango ditu.
Erizaintzaren zientziatik bizitzak zaintzen eta salbatzen ikasteko aukera paregabea izango duzu!
